طقس بكرة الأربعاء: بعد الأمطار على أغلب المناطق الشمالية.. الهدوء يعم البلاد مع رياح نشطة

0

## التفاصيل:
– بالفعل اتأثرت المناطق الشمالية لحالة عدم استقرار سريعة تم تصنيفها متوسطة الفعالية بسبب منخفض جوي علوي بارد لكن لا يرتقي إلى منخفض عميق أو عميق وعاصف.. عشان كدة كانت أبرز سماته هي الأمطار فقط واللي كانت رعدية على بعض المناطق مع الانخفاض البسيط في الحرارة.. عشان كدة كان الوضع لا يستدعي أي تحذير يذكر غير على طرق السفر فقط لإن الامطار بتشكل خطورة اكبر على القيادة
– وأما بعد… تشرق بكرة الأربعاء شمسكم بإمتياز مع سماء شبه صافية أغلب فترات النهار وقليلة من الغيوم على مناطق قليلة لتعطي انطباع الدفء بشكل أكبر من اليوم في أجواء مائلة للبرودة نسبيًا في الظل إلى مائلة للدفء تحت أشعة الشمس وشديدة البرودة ليلًا
– بتستمر فقط فرص الأمطار على قليل من مناطق سيناء وخليج السويس حتى فجر الأربعاء تقريبًا بدون تأثير.. لكن باقي فترات اليوم مستقرة هناك
– وده لا يمنع قليل من نشاط الرياح على بعض مناطق الجمهورية لكنه نشاط قليل في هبّاته ويكون قوي أحيانًا لقليل جدًا من الوقت على الأماكن المكشوفة والمرتفعة.. ما عدا مناطق قليلة من جنوب خط خليج السويس خاصة عند رأس غارب والطور وبالقرب من الغردقة تنشط الرياح بشكل شديد وقد تصل هبّاتها لحد العاصفة أحيانًا لبعض الوقت هناك فقط مع اثارة للرمال والأتربة.. وكمان على أقصى مرتفعات جبال سانت كاترين
– لحد هنا خلص الطقس
—————————————-
## هنا شوية دردشة للي حابب يكمل:
– بالنسبة للناس كانت حابة تستفسر بأي مقياس يتم تصنيف الحالات من ضعيفة او متوسطة او قوية حتى شديدة الفعالية
أولًا: يقاس بقوة المنخفض هل كان سطحي أم علوي أم كان متعمق أو عاصف حسب سرعة الرياح الثابتة المرافقة له
ثانيًا: يقاس على مدى تأثير قوته على إجمالي المناطق وليس لمنطقة واحدة أو منطقتين: فهل كمية الامطار أو شدة الرياح المصاحبه له ممكن تؤدي لكوارث لا قدر الله زي مثلا ارتفاع كبير في مناسيب المياه على شوارع كتير مع انسداد للانفاق وغرق مناطق هابطة أو حتى لإمكانيته لاسقاط العديد من الاشجار او العواميد بسبب سرعات الرياح العالية؟
ثالثا: هل حتى ان غزرت الامطار او رافقها رعد او تساقط لحبات البرد لكن ايه هي المدة المتوقعة لحدوث ده؟ هل تستمر لدقائق او ساعات قليلة او كثيرة.. ام على مدار يوم بأكمله لمناطق عديدة
– اذا عوامل كتير لازم تتحسب مع بعض وتكتمل حتى يتم تصنيف الحالة متوسطة إلى قوية ولا شديدة.. مع العلم ان من المرات النادرة ان تم تصنيف الحالة لشديدة وهي تعتبر كأقصى وصف تطلق على منخفض كانت وقت حالة مارس 2020 كما تم توصيفه هنا على الصفحة
– معلومة مهمة لازم تبقى عارفها.. مفيش في اي جهة ارصاد بالعالم او في لغة الطقس بأن يتم اطلاق تسمية على المنخفضات.. التسمية تطلق على الأعاصير فقط… لذلك اعرف صاحبك وعلم عليه.. أول ما تشوف منشور من وش واحد بيقولك المنخفض الفولاني اعرف انه بيكدب عليك حتى لو كان صادق في اي حاجة قبل كدة فهو ما زال عنده مرض الشهرة والتجارة هيلعب بيك في اي وقت.. أيوة يعني لا فيه حاجة اسمها عاصفة التنين ولا القرش ولا الحوت ولا حتى عاصفة الكتكوت او منخفض القراميط
– معلومة مهمة تاني.. اي حد يقولك الخرايط تشير.. اصل فيه حالة تلوح في الافق.. الحق ده التحديثات الجديدة بتقول….. اعرف انه بياع لب.. ليه بقى عشان للأسف ربنا يجازي اللي وضع اشياء المفروض مختصين بس هما اللي يشوفوها ويدرسوها.. بقت للعامة.. يعني اي حد معدي يطلع عليها.. مع التجويد والتقفيل المصري جعل الكثير والكثير من صفحات الهبد… لإن ديه كلها اشياء وبكل صدمة هي ليست توقعات هي مجرد نماذج محاكاه تخاطب مختص ودارسي الطقس عشان يتعمل عليها استنتاجات كتير وحل لمعادلات كتير وتحطها انت كمختص زي كمية اللبن على الشاي بمقادير معينة عشان في النهاية تطلع معاك أحلى كوباية شاي بلبن وتقدمها للجمهور بطعم حلو محدش كتير يختلف معاك فيها.. الا بقى لو انت مبتحبش الشاي بلبن ف ديه حاجة ترجعلك
– عشان كدة في النهاية وديه معلومة اكتر للمتابعين الجدد للي مبيعرفوش سياسة الصفحة.. هنا مبيتمش أي مناقشة نهائي لكلام غير علمي عن الطقس أو اي منشورات مالهاش أي قيمة لصفحات هدفها الربح والمتاجرة بفوبيا الناس.. لإن لو رديت يبقى كدة انا اللي اديتها القيمة.. وانا متعودتش في حياتي اعطي لشيء قيمة وهو ليس له قيمة في الاساس لمنع تشجيع المنشورات السلبية على انتشارها.. لإني ياما ذكرتلكم بلاش يا جماعة متابعة 60 مصدر للطقس هي مش بكترها صدقوني.. ومش شرط تتابعوني.. انا مش الخبير اوي برده وليس الافضل على الاطلاق.. لكن تابع مصدر او مصدرين فقط بالكتير عشان متتشتتش لإن كله واحد له طريقة سرده وطريقة شرح ووصف لكن متمشيش على الفيس اي جملة مكتوب فيها طقس تقوم عامل لايك ومتابعة وتقول مش هيخسر .. لاء هيخسر… لإن اللي دايمًا بتوقعه بيحصل وهو لما بيحصل ترهيب في اي حالة من برة بيفضل عند القارئ استعداد لتجميع ااااي شيء هيتقال هنا ويعمله ربط بإن الصفحتين صادقين وفي الاخر مش هيلاقي غير انه اخد في وشه ولبس في الحيط
– اخر حاجة وهو على سبيل المثال وليس الحصر عن اللي قولته كان صحيح.. وهو طقس القاهرة الكبرى النهاردة.. لحد اخر لحظة امبارح كتبت بكل دقة ان الاجواء هتكون في بدايتها مستقرة وهتلاقوا الشمس طالعة بجدارة مفيش اي حاجة وبل العكس كتبت ان اللي هيتقل زيادة عن اللزوم قبل المطر هيتحر لإن الجو فيه رطوبة عالية.. وقولت ان الامطار الحقيقة هتكون في الحالة ديه اما على جميع مناطق محافظات القاهرة الكبرى أو أغلبها وهتكون رعدية أحيانا وقولت ان ذروتها في النهار فقط بأمطارها برعدها سواء حصلت على اي مكان او محصلتش… وفي نفس البوست لا قولت اي تحذير واحد ولا قولت لحد متنزلش ولا قولت للأطفال تقعد زي المرة اللي فاتت لكن اللي حصل ان الناس اتخضت اكتر من حالة الاسبوع اللي فات اللي حذرت من نزول الاطفال فيها ليييييه يا ترررى؟؟ وهو بسبب الترهيب اللي اتعمل برة التهويل خلاك مش شايف التهوين البسيط هنا

نقلا عن صفحة الطقسجي

Comments
Loading...

This website uses cookies to improve your experience. We'll assume you're ok with this, but you can opt-out if you wish. Accept

%d مدونون معجبون بهذه: